Արշավիր Շիրակյանը ծնվել է 1900-ին, Պոլսում: Դեռ մանուկ հասակից նա հայրական տանը տեսել է հեղափոխական դեմքերի, ինչն էլ պատճառ է հանդիսացել` համալրելու ՀՀԴ շարքերը: Արշավիրը հասակ առավ հայ հեղափոխական մտավորականության լավագույն ներկայացուցիչների մոտ, որոնք վճռորոշ ազդեցություն թողեցին նրա հոգեկան ու գաղափարական ձևավորման վրա: Նա իր հեղափոխական գործունեությունը սկսել որպես նամակատարթղթ ատար` սուրհանդակ, ապա զինամթերք փոխադրող: 1917-18թթ. և զինադադարից հետո զենք փոխադրելու գաղտնի աշխատանքի է լծվում: Ապա իրեն է վստահվում հայանուն դավաճան ու մատնիչ Վահե Իսհանի ահաբեկումը Պոլսում: Հետագայում իր թեկնածությունն է առաջարկում մասնակցելու Եղեռնը կազմակերպող և իրականացնող երիտթուրքերի հանցագործ ղեկավարների ահաբեկման գործին:
1921-ի դեկտեմբերի 5-ին Հռոմում Արշավիրը նետվում է ընթացող կառքն ու ահաբեկում թուրք վեզիր Սայիդ Հալիմին` արևմտահայության բնաջնջման ծրագիրը ստորագրողին:
1922-ի ապրիլի 17-ին (Սբ. Զատիկի օրը), Բեռլինում` Թալեաթ փաշայի բնակարանի առջև, Արշավիր Շիրակյանը Արամ Երկանյանի հետ գնդակահարեցին ՙԹեշքիլաթ-ը մահսուսե՚ կազմակերպության հիմնադիր, ՙԹուրքիան` թուրքերին՚ գաղափարի ամենամոլեռանդ հեղինակ Բեհաէդդին Շաքիրին ու Տրապիզոնի նախկին նահանգապետ Ջեմալ Ազմիին: Առաջինը հղացել էր հայ մանուկներին Սև ծովում խեղդելու հրեշային ծրագիրը, իսկ երկրորդը` իրագործել: Նրանք եկել էին մխիթարելու մեկ տարի առաջ Բեռլինում սպանված թուրք դահիճ Թալեաթի կնոջը: Ահաբեկումը կատարվեց կեսգիշերին, Թալեաթի կնոջ սարսափահար աչքերի առաջ…:
Ժողովրդական վրիժառուն 1923-ին հաստատվել է ԱՄՆ-ում, որտեղ ապրել ու գործել է մինչև մահը` 1973 թվականը: